Фейк: «Жапонияда кедейлерге арналған қарбыз қабықтары сатылады»
Әлеуметтік желілерде жапон супермаркеттерінде қарбыздың қабықтары сатылатыны туралы жаңалық талқылануда. Бұл қарбызды толықтай сатып ала алмайтын кедейлерге көмек ретінде жасалған деген пікір тараған. Бұл рас па? Анықтап көрейік.
Қарбыз қабықтарының жапон дүкендерінде сатылып жатқаны туралы алғашқы видео әлеуметтік желілерде 2024 жылдың маусымында шықты. Оны Weibo платформасында қытайлық блогер жариялап, былай деп жазды: «Жапондар қарбыз қабықтарын да сатады екен». Кейбір қолданушылар видеода көрсетілген қаптамада «маринадтауға арналған» деп жазылғанын байқаған.
Жапонияда қарбыз — қымбат тұратын жемістердің бірі. Сондықтан ол деликатес болып саналады және көбіне сыйлық ретінде беріледі. Сол себепті қарбыз қабықтары тасталмайды, олар дәстүрлі цукэмоно тағамын дайындау үшін қолданылады.
Цукэмоно — маринадталған көкөністер мен жемістер. Олар көбінесе тіскебасар немесе гарнир ретінде беріледі.
Қарбыз қабықтарын әдетте тұзды ерітіндіде немесе күріш кебегінде маринадтайды. Мұндай тәжірибе басқа елдерде де бар. Мысалы, АҚШ-тың оңтүстігінде маринадталған қарбыз қабықтары танымал. Оларды дайын күйінде жергілікті және онлайн дүкендерден сатып алуға болады. Немесе үйде дайындауға болады, америкалық аспаздар оның рецептілерін жиі жариялайды.
Қарбыз қабықтары А, С және В тобының дәрумендеріне, сондай-ақ калий, магний, темір және мырыш сияқты минералдарға бай. Олар иммунитетті нығайтуға, тері мен жүрек саулығын қолдауға пайдалы.
Сонымен қатар, антиоксиданттар — ликопин мен бета-каротин бар, олар клеткаларды тотығу стрессінен қорғайды. Талшықтардың арқасында ас қорытуды жақсартады және токсиндерді шығаруға көмектеседі. Айрықша назар аударатын зат — цитруллин аминқышқылы. Ол қан тамырларын кеңейтеді, қан айналымын жақсартады және қысымды төмендетеді. Бұл жүрек саулығы мен физикалық жүктемеден кейін қалпына келуге өте маңызды.
Демек, видео шынайы болғанымен, оған берілген түсініктеме қате. Жапонияда қарбыз қабықтарын кедейлерге арналған өнім ретінде емес, ұлттық тағамдарға қажетті ингредиент ретінде сатады. Сондықтан әлеуметтік желілердегі хабарлама — фейк.
