Қылмысқа қалай ұрынып қалуыңыз мүмкін немесе Kaspi Pay-ді неге «жалға беруге» болмайды
Қазақстандық алаяқтар Kaspi Pay-ді «жалға беруді» ұсынады. Олар оңай табыс аласыз дейді, ал шын мәнінде, аңқау адамдар қылмыскердің сыбайласы болады. Бұл схеманың қалай жұмыс істейтінін түсіндірейік.
Мәні неде?
Алаяқтар әлеуметтік желілерде хабарландырулар жариялайды. Олар Kaspi Pay аккаунты бар кәсіпкерлерге оны «жалға беруді» ұсынады. Оның орнына оңай табыс түсіп, барлық салықтарды өздері төлейтінін айтады.
Оларға Kaspi Pay не үшін керек?
Мысалы, сіз олардың хабарландыруына сеніп, Kaspi Pay аккаунтыңызды «жалға бердіңіз» делік. Алаяқтар сіздің аккаунтыңыз арқылы маркетплейстерде тауарлардың жарнамаларын тартымды бағамен орналастырады, сатып алушылардан ақша жинайды, бірақ ешқандай тауар жібермейді. Бұл тауарлар шын мәнінде ешқашан болмаған. Былайша айтқанда, алаяқтар сіздің атыңыздан адамдарды алдайды.
Бұл заңсыз екені түсінікті. Онда неге басқа адамның аккаунтын жалға алады?
Алаяқтар сенімді етіп түрлі сылтаулар ойлап табады. Мысалы, ЖК-сі уақытша бұғатталғанын, не ҚҚС шегінен аспау үшін осылай жасап жатқанын айтады. Немесе басқа да шынайы көрінетін себептерді алға тартады. Көбінесе, бұл себептер заңды секілді көрініп, адамды сендіреді.
Онда неге өз атына аккаунт ашпайды?
Өз атымен жалған тауар сату өте қауіпті. Полиция ондай алаяқтарды тез тауып, жауапқа тартады.
Бұл маған не қауіп төндіруі мүмкін? Менің қатысым жоқ қой.
Біріншіден, алаяқтар сіздің атыңыздан сауда жасап, ЖК-ге үлкен көлемде ҚҚС қарызын қалдыруы мүмкін. Мұндай жағдайлар туралы қазақстандық БАҚ жазған болатын. https://www.nur.kz/nurfin/personal/2064548-obmanut-vseh-moshenniki-natselilis-na-individualnyh-predprinimateley-v-kazahstane/
Екіншіден, Kaspi Pay аккаунтыңызды бөтен адамның қолдануына рұқсат беру – алаяқтық схемасына қатысу деген сөз. Алданған сатып алушылар полицияға жүгінгенде, барлығы сіздің аккаунт арқылы жасалғаны анықталады. Бұл — қылмыстық іс.
Мен алаяқтарға көмектесіп жатқанымды білген жоқпын, демек, мен кінәлі емеспін ғой?
Жоқ. Сіз заң бұзып жатқаныңызды білмесеңіз де, бұл жауапкершіліктен босатпайды.
Мұндай жағдайдан қалай қорғануға болады?
Ешқашан және қандай жағдай болмасын өзіңіздің банк аккаунтыңызды, әсіресе Kaspi Pay-ді, бөтен адамдарға бермеңіз. Есіңізде болсын, басқа адамның аккаунтын «жалға алуға» заңды себеп болмайды.
«Kaspi.kz алаяқтарға қарсы» науқаны аясында Kaspi Pay-ді жалға алу схемасы туралы жаңа бейнеролик шықты. Оның қалай жұмыс істейтінін көріп шығыңыз.
Еске салайық, Kaspi.kz Қаржы нарығын дамыту және реттеу агенттігінің қолдауымен ең жиі кездесетін алаяқтық схемалар туралы бірқатар бейнероликтер түсірді. Жаңа видеолар әр екі апта сайын Kaspi.kz-тің ресми YouTube арнасында жарияланады.
