Онлайн алаяқтар балаларды алдауда – Ұлттық банктің ескертуі
ҚР Ұлттық Банкі балалар мен жасөспірімдерге қатысты интернет-алаяқтық көбейіп бара жатқанын ескертіп отыр. Қазақстандықтарға кәмелетке толмағандарды мұндай схемалардан қалай қорғауға болатыны жөнінде кеңес берілді.
Қаржы институтының мәліметінше, киберқылмыскерлер өздерін таныс адамдар, мемлекеттік органның немесе түрлі ұйымдардың қызметкері ретінде таныстырып, жеке және қаржылық ақпаратқа қол жеткізуге тырысады.
«Алаяқтықтың кең тараған тәсілдеріне фишинг пен спуфинг жатады – бұл парольдерді, банк картасының деректерін және басқа да құпия мәліметтерді ұрлау мақсатында жалған сайттар мен мобильді қосымшаларға сілтеме жіберу арқылы жүзеге асады.
Қосымша қауіп төндіретіндер – пайда табу, дерек ұрлау немесе зиянды контент тарату мақсатында әрекет ететін «виртуалды таныстар», – делінген хабарламада.
Осындай қауіптердің алдын алу мақсатында Ұлттық Банк ата-аналар мен педагогтерді балаларға кибергигиена негіздерін және интернетті қауіпсіз пайдалану ережелерін үйретуге шақырады. Жасөспірімдер өзінің жеке және дербес деректерін қорғау қаншалықты маңызды екенін ұғынуға тиіс.
Әрбір ата-ана баласының мобильді құрылғысына «ата-ана бақылауы» функциясын, антивирус бағдарламасын және браузердің қауіпсіз режимін пайдаланғаны жөн. Сондай-ақ, балалардың онлайн саудасын және қаржымен байланысы бар әрекеттерін бақылап, сенімді құпиясөз орнатуға көмектескені және қос факторлы аутентификацияны іске қосып бергені дұрыс.
«Жасөспірімдерге бейтаныс адамдармен хат алмасуға, жеке мәліметтер мен фотосуреттерді бөгде адамдарға жіберуге, ата-анасының келісімінсіз онлайн-сауда жүргізуге болмайтынын, сондай-ақ тек ресми сайттар мен қосымшаларды пайдалану керек екенін ескерту қажет.
Кәмелетке толмаған балалардың цифрлық кеңістіктегі қауіпсіздігін қамтамасыз ету – тек ата-ананың ғана емес, педагогтер мен балалардың өздеріне де жүктелетін ортақ міндет», – дейді Ұлттық Банк өкілдері.